þeir hofðv spurt vm ferð Egils ok ætlvðv at gera Bergonundi orð en er Egill kendi skípit þa
stefndi hann sem beínst  þa en er skipín renduz at kom barðit batzíns a kínn vangan
karfanns Rognvalldr het a menn sina ok bað þa taka vapn sín ok veria sik þat gerðv ꜱva
Egill spratt vpp ok greip spíot eítt ok het a menn sína at þeir skylldv engan með fíorfui lata brott
komaz þeir Ravgnvalldr uorðv sík ual En fyrir þvi at þeir voru fæʀí saman en braðum bar at þa lavk
ꜱva at Egill fekk sígr ok gengu vpp a karfann ok fell þar ʀavgnvalldr ok allir menn hans þeir Egill rerv þa til eyiarínnar
þa qat Egill visu Borðumz ver ne virðar vigleiptr sona heıpter heíptir bloð ǫxar let ek
bloði bauðmilldz ok gvnhilldar þar fellv þo þollar xííí lagar mna stendr af styríar
skyndí starf a einum karfa En er þeir Egill koma til herzlu þa runnu þeir þar upp til bæiarins
með aluæpni En er þat sa þorir ok hans felagar þa hliopv þeir af bænum allír ok forðuðv Ser En þeir Egill
ræntu þar ollu þvi er þeir komv hondvm  fara nu eptir þat ut til skípsíns ok barv þa fenginn
allan a kaupskípít var þa ok æigi langt at biða aðṙ byʀ rann  af landi bvaz þeir Egill þa til brvtferðar
En er þeir uoru seglbvnir þa gekk Egill upp  eyna hann tok i hond ꜱer hesli stǫng hann gekk fram a biargsnaus
eina þa er vissi til landz vpp hann tok þa hros hofvð ok setti a stongína ok veitti formala þenna
Her set ek vpp nið stong ok sny ek þeꜱu niði a hond Eiʀiki konungi ok Gvnnhilldí sny ek þeꜱu niði 
land uettir allar þær er þetta land byggia ꜱva at allar þǽr fari villi raða ok engi hitti sitt inni fy en
þær hafa rekit or landi eiʀik konung ok gvnhilldi Eptir þat skavt hann niðr stonginní i biargrífu eína ok let þar standa
hann sneri hofðínv a land vpp En hann reist rvnar a stonginni ok sagði enn sama formala þa ge
hann ut a skíp toku þeir þa til segls ok sigldv a haf út þa tok by at vaxa ok gerði veðr hvast
ok þeim hagstǽtt ge skipit mikit þa qat Egill visu þel hoggr stort fyrir stalí stafn kvigs a veg jafnan
ut með ela meilí avnduʀ fiotuʀ grundar En sealf bvín selív suefr eirar uanr þeirar
gellis alfr aðr gvstv grand of stꜳl ok brandi Forst þeim val ok komu at landi i borgar fiorð
hellt hann þa skipi sinu til hafnar ok barv af farminn for Egill heim til borgar vistuðuz þa allir
menn hans skallagrimr gerðiz þa hrummr af elli tok Egill þa við fiar forraðvm ok bvss varðveitzlv
fra Þorgeiri Þorgeiʀ lambi het maðr hann atti þordisi ynguars dottur systur berv moðvr Egils
hann bio a lamba stoðvm jnn fra alpta nesi hann var avðigr maðr ok virðr val monnum Sonr
þeira var þorðr er bio siðan a lamba stǫðvm eftir foðvr sinn En er Egill kom til islandz þa uar þat vm haustit
fyrir uetr nǽtr at þorðr for inn til borgar ok hitti Egil frænda sinn ok bauð honum þangat
til drykkív til sín En hann het forinni En er at þeiri stvndu kom bioz Egill til ferðar ok asgerðr
kona hans þau voru xí. saman En er Egill uar buinn gekk skallagrimr vt með honum ok huarf
til hans aðr hann stigi a bak þa mællti Grimr Seínt þikki mer þu hafa greítt mer silfr þat er Adalsteinn
konungr sendi mer eðr hverníg ætlar þv at þat fe skyli fara Egill mællti Er þer nv feftt faðir sagði hann
Ek ætlaði at tv mundir enn hafa eína kistv eðr tvǽr fullar af silfri Suo þikki mer s.
Grimr sem þv munir þikkiaz skipt hafa lausa fe með okkr munt u ok lata lika þer at
ek geri af slikt er mer likar af þvi er ek hefir at uarðueíta Egill svaraði þv mvnt enskiss lofs
þikkiaz þurfa mik at biðía vm þetta mal er þv munt radit hafa með þer hve