mikinn her Haʀalldr konungr uar ok norðr þar kominn með lið sítt ok var fundr þeira fyrir sunnan solkel
var þar hín mesta orrusta ok mikit ꝼall man̄ mann fall af huarvmtueggium þar fellu af liði haʀallds konungs Jarlar
tueir Asgavtr ok Asbiorn ok tueir synir hakonar hlaða Jarls griot garðr ok herlaugr ok mart annat
stor menni En af líði mærakonungs fell hann sealfr ok Auðbiorn konungr En ꜱaulfi konungs. sonr
komz a flotta ok varð siðan vikingr ok gerði opt mikinn skaða a ʀiki haʀallds konungs Eptir þat lagði
Haraldr konungr unðir sik svnnmæri Vermundr konungr broðir Auðbiarnar konungs hellt fyrða fylki
ok gerdiz konungr yfir Nu gerðu menn haʀallds konungs rað at hann skylldi æigi fara suðr vm stað 
haustdegi ok setti Roalld Jarl yfir mæri ok naumsdalí ok hafði hann fiolmennt um sik
Haraldr konungr for norðr til þrandheims þat sama haust veittu synir atla Jarls heimsokn a aulfi
hnufu ok villdv drepa hann þeir hofðv lið svo mikit at Avlfir hafði æigi viðstoðv ok komz
með hlaupi vndan for hann siðan norðr a mærí ok hitti þar Haralld konung ok gekk a hond honum ok for
með honum til þrandheims ok komz i kiærleika mikla við Haralld konung ok var með honum lengi ok gerdiz skalld
hans vermundr inni brendr Þann uetr for Roalldr Jarl hit efra um eiða skog ok ꜱva svðr it efra
ok hafði niosn af vermundi konungi ok kom þar um nott sem heitir navst dalr ok var vermundr
konungr þar a veitzlv tok Roalldr Jarl hus a þeim ok brendi konung inni með lxxxx manna Eptir þat kom
berzlu kari til motz við Roalld Jarl með langskip Alskipat ok foru þa baðir norðr a mæri
Tok ʀoalldr Jarl skip þav er att hafði vermunðr konungr ok allt lausa fe Siðan for berzlv karí
norðr a fund Harallds konungs ok gerðiz hans maðr Ok um varit eptir for haʀalldr konungr svnðr með landi með skipa lid
ok lagði vndir sik fiorðu ok fialír ok skipaði þar yfir sinum monnum hann setti þar yfir
ʀoalld Jarl yfir fyrða fylkí Haralldr konungr uar miok athugall vm þau fylki er þa uoru ny komin
i hans ualld ok hann hafði þa eígnaz vm lenda menn eðr rika menn ok bændr ok alla þa er honum
uar nokkurrar vpreistar at von þa let hann gera annathvart at vera hans þiónostv menn
eðr fara af landi brott en at þriðia kosti sæta afarkostum Haralldr konungr eignaðiz i hveriv
fylki oðul oll ok nam allt bæði bygdt ok obygdt ok iafn ual sæinn ok votnín ok
skylldu allir bændr uera hans leiglendingar ꜱva ok þeir er a morkina ortu ok ꜱva sallt karlar
ok allir ueiði menn bædi ꜳ sea ok landi þa uoru honum allir lyðskylldir En af þeꜱi aþian
flyðv margir af landi burt ok byvz þa auðnir bæði jamta land ok helsingia land ok vestr folld
dyflin ok a skidi a irlandi norðmande a uallandi katanes skotland ok
orkneyar ok hialland ok færeyiar ok island sendi menn komv til kvelldulfs manna er æigi foru a konungꜱ fvnd
Haralldr konungr la i fiordum með her sinn hann sendi menn þar ꜳ land a fund þeira maɴa
er hann þottiz erendi uið eiga Sendi menn konungs komv til kuelldulfs ok fengv
þar godar uið tokur þeir barv vpp erendi konungs ok sogdv ꜱva at hann villdi finna kuelldvlf
Hefir hann spurn af þer at tu ert gofvgr maðr ok storrar ættar mvnt v æiga kost af honum
mikillar uirðingar er konungi mikit kapp a þvi at hafa þa menn hia ꜱer at hann uerr at afreksmenn
erv at afli ok hreysti Kuelldvlfr sagði at hann var þa gamall ꜱva at hann var þa ekki til
fæʀ at vera a herskipum Mun ek heima sitia ok lata af konungvm at þiona þeir svoruðu