Landnámabók 26b — ed. not skaldic
Not published: do not cite (Anon Ldn 26bIV)
The new edition is either unpublished or unavailable. The following is taken from an old edition (Skj where relevant):
Grímr hét maðr Ingjaldsson, Hróaldssonar ór Haddingjadal, bróðir Ása hersis. Hann fór til Íslands í landaleit ok sigldi fyrir norðan landit. Hann var um veturinn í Grímsey á Steingrímsfirði. Bergdís hét kona hans, en Þórir son þeirra.
Grímr røri til fiska um haustit með húskarla sína, en sveinninn Þórir lá í stafni og var í selbelg, ok dreginn að hálsinum. Grímr dró marmennil, ok er hann kom upp, spurði Grímr: "Hvat spár þú oss um forǫlg vár, eða hvar skulu vér byggja á Íslandi?"
Marmennill svarar: "Ekki þarf ek að spá yðr, en sveinninn, er liggr í selbelginum, hann skal þar byggja ok land nema, er Skálm merr yður leggsk undir klyfjum."
Ekki fengu þeir fleiri orð af honum. En síðar um vetrinn røru þeir Grímur svá, at sveinninn var á landi; þá týndusk þeir allir.
Þau Bergdís og Þórir fóru um várið ór Grímsey ok vestr yfir heiði til Breiðafjarðar; þá gekk Skálm fyrir ok lagðisk aldri. Annan vetr váru þau á Skálmarnesi í Breiðafirði, en um sumarit eptir snøru þau suðr. Þá gekk enn Skálm fyrir, þar til er þau kómu af heiðum suðr til Borgarfjarðar, þar sem sandmelar tveir rauðir stóðu fyrir; þar lagðisk Skálm niðr undir klyfjum undir enum ytra melnum. Þar nam Þórir land fyrir sunnan Gnúpá til Kaldár fyrir neðan Knappadal milli fjalls og fjǫru. Hann bjó at Rauðamel enum ytra. Hann var hǫfðingi mikill.
Þá var Þórir gamall og blindr, er hann kom út síð um kveld og sá, at maðr røri útan í Kaldárós á járnnǫkkva, mikill og illiligr, ok gekk þar upp til bjœar þess, er í Hripi hét, og gróf þar í stǫðulshliði; en um nóttina kom þar upp jarðeldr, og brann þá Borgarhraun. Þar var bœrinn, sem nú er borgin.
Son Sel-Þóris var Þorfinnr, er átti Jófríði, dóttur Tungu-Odds; þeirra synir váru þeir Þorkell ok Þorgils, Steinn ok Galti, Ormr ok Þórormr ok Þórir. Dóttir Þorfinns var (Þorbjǫrg), er átti Þorbrandr ór Álftafirði.
Þeir Sel-Þórir frændr enir heiðnu dó í Þórisbjǫrg.
Þeir Þorkell ok Þorgils, synir Þorfinns, áttu báðir Unni, dóttur Álfs ór Dǫlum.
Skálm, merr Þóris, dó í Skálmarkeldu.
Text is based on reconstruction from the base text and variant apparatus and may contain alternative spellings and other normalisations not visible in the manuscript text. Transcriptions may not have been checked and should not be cited.
Use the buttons at the top of the page to navigate between stanzas in a poem.
The text and translation are given here, with buttons to toggle whether the text is shown in the verse order or prose word order. Clicking on indiviudal words gives dictionary links, variant readings, kennings and notes, where relevant.
This is the text of the edition in a similar format to how the edition appears in the printed volumes.
This view is also used for chapters and other text segments. Not all the headings shown are relevant to such sections.