ÞJ ch. 27

The new edition is either unpublished or unavailable. The following is taken from an old edition (Skj where relevant):

Nú sigla þeir Jón ok Eiríkr til Saxlands, ok stýrði hann dreka þeim, sem hann
hafði smíðat í fjallinu, en Eiríkr þeim dreka, sem hann hafði gjöra látit, ok
var in mesta gersimi; með þeim var í ferð Marsilía in væna, ok var þeirra
ferð allskrautlig. Komu þeir þar til lands, sem þeir mundu kjósa. Konráðr var
þá ok kominn til Saxlands, at láta kóróna son sin Vilhjálm til keisara yfir
Saxlandi; ok sem þeir feðgar vissu, at skipin váru landföst, þykjast þeir vita,
at nokkrir ríkir menn ok nafnkunnugir eru við land komnir, ok gengu í móti
þeim með friði ok fagnaði, bjóðandi af nýju heim til veizlu virðuligrar; ok
þar sátu þeir Jón, þar til at keisaravígslan fór fram. Tóku nú þeir Jón ok
Eiríkr ok Marsilía skírn ok helga trú með öllu þeirra liði, ok lofuðu allir men
auðnu þeirra; kenndust þá ok við þá Jón ok Eirík, at þeir váru af inum
dýrustum ættum. Ok eftir veizluna gengu þeir ok til konunganna, þakkandi
þeim með mörgum fögrum orðum sinn herradóm, ok sögðust ætla heim at
sækja Hlöðvi konung, móðurföður sinn; en Konráðr konungr ok keisari son
hans gáfu þeim blítt orlof, ok þar með ágætar gjafir ok vináttu sína. Síðan
sigldu þeir til Frakklands, ok fundu Hlöðvi konung; fagnar hann vel Eiríki
frænda sínum með allri makt ok virðingu ok öllum þeim; virðast þeir
konungi, sem öllum öðrum mönnum it mesta afbragð annarra manna, fyrir
afls sakir, vizku, vænleiks ok allrar atgörvi. Jafnan lét Hlöðvir konungr hafa
burtreiðir, skot ok sund ok aðrar íþróttir; reyndist Eiríkr jafnan inum mestu
riddurum jafn ok framar í öllum íþróttum, en Jón má við engan þreyta sakir
afls ok karlmennsku; vann hann því langt yfir alla sérhverjar íþróttir, skot,
sund, turniment ok allar listir aðrar, sem þar var vant at fremja.