skaldic

Skaldic Poetry of the Scandinavian Middle Ages

Menu Search

Lausavísur — ǪrvOdd LvVIII

Ǫrvar-Oddr

Ǫrvar-Oddr, Lausavísur — Margaret Clunies Ross

Not published: do not cite (ǪrvOdd LvVIII)

 

Menn sék ganga
frá Munarvágum
gunnar gjarna
í grám serkjum;
þeir hafa reiðir
rómu háða;
eru okkur skip
auð á strǫndu.
 
The new edition is unavailable.
This text is from an old edition
Nú var mér ótti
einu sinni,
er þeir grenjandi
gengu af ǫskum
ok emjandi
í ey stigu
tírarlausir,
vǫru tólf saman.]
 
The new edition is unavailable.
This text is from an old edition
Því munk orði
andsvǫr veita :
þeir munu í aptan
Óðin gista
tólf berserkir,
en vit tveir lifa.
 
The new edition is unavailable.
This text is from an old edition
Hér eru halir
harðir komnir,
tírarlausir,
fara tólf saman;
einn skal við einn
eiga nema sé deigr
hvatra drengja
eða hugr bili.
 
The new edition is unavailable.
This text is from an old edition
Hvat er þér Hjálmarr?
hefr þú lit brugðit;
þik kveðk mæða
margar undir;
hjálmr er þinn hǫggvinn,
en á hlið brynja;
nú kveðk fjǫrvi
of farit þínu.
 
The new edition is unavailable.
This text is from an old edition
It skuluð hlýða
hróðri mínum
Sigurðr ok Sæólfr,
sessunautar,
ykr ák gjalda
greypan verka
hróðr harðsnúinn
huglausum tveim.
 
The new edition is unavailable.
This text is from an old edition
Þú látt Sæólfr
soðgólfi á,
dáða vanr
ok dýrs hugar,
en ek einn út
með Akvítánum
fjóra menn
fjǫrvi næmðag.
 
The new edition is unavailable.
This text is from an old edition
Slótt við meyjar
málþing Sæólfr,
meðan loga létum
leika of kynnum,
unnum harðan
Hunding drepinn
ok Ǫlvi var
aldrs of synjat.
 
The new edition is unavailable.
This text is from an old edition
Þú látt Sigurðr
í sal meyja,
meðan við Bjarma
bǫrðumk tysvar,
háðum hildi
hauksnarliga,
en þú seggr í sal
svaft und blæju.
 
The new edition is unavailable.
This text is from an old edition
Sæólfr vart eigi
þars sjá knáttum
brynjur manna,
blóði þvegnar;
hrukku oddar
í hringserkjum,
en hǫll konungs
heldr kannaðir.
 
The new edition is unavailable.
This text is from an old edition
Sigurðr vart eigi
þars sex hruðum
hábyrðuð skip
fyr Hauksnesi;
vart ok eigi
vestr með Skolla,
þars Engla gram
aldri næmðum.
 
The new edition is unavailable.
This text is from an old edition
Sæólfr vart eigi,
þars sverð ruðum
hvǫss á jarli
fyr Hléseyju,
en þú hallaðisk
heima á milli
kynmálasamr
kálfs ok þýjar.
 
The new edition is unavailable.
This text is from an old edition
Sigurðr vart eigi,
er á Selund feldak
bræðr bǫðharða
Brand ok Agnar,
[Ásmund, Ingjald,
Álfr var enn fimti]
en heima látt
í hǫll konungs
skrǫkmálasamr,
skauð hernumin.
 
The new edition is unavailable.
This text is from an old edition
Sæólfr vart eigi
suðr á Skíði,
þars konungar
kníðu hildi;
óðum dreyra,
svát í ǫkla tók,
víg vakðak mǫrg;
vart eigi þar.
 
The new edition is unavailable.
This text is from an old edition
Sigurðr vart eigi
í Svíaskerjum,
þás Hálfdani
heiptir guldum;
urðu randir
rógmiklaðar
sverðum skornar,
en sjálfr drepinn.
 
The new edition is unavailable.
This text is from an old edition
Heldum aski
í Elfarsker
teitir ok reifir
at Trǫnuvágum,
þar lá Ǫgmundr
Eyþjófs bani,
trauðastr flugar,
á tveim skipum.
 
The new edition is unavailable.
This text is from an old edition
Þar létum vér
lindi barða
hǫrðu grjóti,
hvǫssum sverðum;
þrír lifðum vér
en þeir níu,
hrókr hernuminn,
hví þegir nú?
 
The new edition is unavailable.
This text is from an old edition
Sæólfr vart eigi
Sámseyju í,
þars vit Hjǫrvarðr
hǫggum skiptum;
tveir várum vit,
en þeir tólf saman,
sigr hafða ek,
sazt kyrr meðan.
 
The new edition is unavailable.
This text is from an old edition
Gekk ek of Gautland
í grimmum hug
sjau dægr saman,
áðr Sæund fyndak;
knáttak þeira,
áðr þaðan færak,
fimtán liða
fjǫrvi ráða.
[en þú gjǫgraðir
gárungr vesall
síð of ǫptnum
til sængr þýjar.]
 
The new edition is unavailable.
This text is from an old edition
It munuð hvergi
hæfir þykkja
Sigurðr ok Sæólfr
í sveit konungs,
ef Hjálmars getk
ens hugumstóra,
þess er snarligast
sverði beitti.
 
The new edition is unavailable.
This text is from an old edition
Gekk skarpr Þórðr
fyr skjǫldu framm,
hvargi er orrostu
eiga skyldum;
hann lét Hálfdan
hníga at velli,
fræknan stilli,
ok hans fylgjara.
 
The new edition is unavailable.
This text is from an old edition
Várum Ásmundr
opt í bernsku
fóstbræðr tveir
fullvel saman,
bar stundar opt
stǫng darraðar,
þars konungar
kappi deildu.
 
The new edition is unavailable.
This text is from an old edition
Hefk á Saxa
ok Svía herjat,
Frísi ok Frakka
ok á Flæmingja,
Íra ok Engla
ok endr Skota;
þeim hefk ǫllum
óþarfr verit.
 
The new edition is unavailable.
This text is from an old edition
Nú hefk dýra
drengi lifða,
þás forðum mér
fylgðu úti;
munu víst eigi
verða síðan
frægri fyrðar
í fólkroði.
 
The new edition is unavailable.
This text is from an old edition
Nú hefk órar
íðnir talðar,
þærs forðum vér
framðar hǫfðum;
opt gengum vér
til ǫndvegis
sigri fegnir;
latum Sæólf mæla.
 
The new edition is unavailable.
This text is from an old edition
Oddr brendi hof
ok hǫrga braut
ok trégoðum
týndi þínum;
gerðu ekki
góðs í heimi,
er þau ór eldi
ǫsla máttut.
 
The new edition is unavailable.
This text is from an old edition
Hirðik eigi,
þótt hætir þú,
fárgjarnt hǫfuð,
Freys reiði mér;
veitk í eldi
ásu brenna;
trǫll eigi þik;
trúik guði einum.
 
The new edition is unavailable.
This text is from an old edition
Fæddi mik Ingjaldr
upp í bernsku,
sás Eikund réð
ok Jaðar byggði.
 
The new edition is unavailable.
This text is from an old edition
Oddr sveigði álm,
ǫr fló af streng,
Jólfs-smíði beit
Álf í gǫgnum;
býðrat blót hónum
svát hann þiggi,
hlakka hrafnar
of hræi Bjálka.
 
The new edition is unavailable.
This text is from an old edition
Eflðu mik ǫrvar
ok Jólfs-smíði,
stórgǫr skeyti
ok stinnr bogi,
ok þat et fimta,
er fregna skalt,
at ek við ásu
aldri þýddumk.
 
The new edition is unavailable.
This text is from an old edition
Læt ek fyrstan
Frey ok Óðin
blinda báða
á bál fara;
urðu æsir
undan at flýja,
hvars í flokki
fundizk hǫfðum.
 
The new edition is unavailable.
This text is from an old edition
Eltak ásu
ørhjartaða
sem fyr úlfi
geit ǫrg rynni;
illr er Óðinn
at eingavin,
skuluð eigi ér
skratta blóta.
 
The new edition is unavailable.
This text is from an old edition
Close

Log in

This service is only available to members of the relevant projects, and to purchasers of the skaldic volumes published by Brepols.
This service uses cookies. By logging in you agree to the use of cookies on your browser.

Close

Information about a text: poem, sequence of stanzas, or prose work

This page is used for different resources. For groups of stanzas such as poems, you will see the verse text and, where published, the translation of each stanza. These are also links to information about the individual stanzas.

For prose works you will see a list of the stanzas and fragments in that prose work, where relevant, providing links to the individual stanzas.

Where you have access to introduction(s) to the poem or prose work in the database, these will appear in the ‘introduction’ section.

The final section, ‘sources’ is a list of the manuscripts that contain the prose work, as well as manuscripts and prose works linked to stanzas and sections of a text.