Íslendingabók Ara fróða : AM 113 b fol : A digital edition

Schedæ ara preſts froda

⟨J⟩ſlendinga boc gorþa ec fyrſt byſcopom ǫrum þorlaki oc katli . oc ſyndac bęþi þeim oc Sęmundi presti . En meþ þvi at þeim licaþi ſva at hava eþa þar viþur auka þa ꜱcrifada ec þeꜱa of et ſama far fyr vtan attar tolo oc conunga ęvi oc iǫce þvi er mer varþ ſidan cuɴara oc nu er geʀ ſagt a þeꜱi ena þeiʀi. En hvatki eſ nuſagt eſ i froþom þeꜱom þa er ſcyllt at hava þat helldur er ſaɴara reyniſc ⟨H⟩alfdan Hvitbeiɴ upplendinga conungr Sonr Olafs Tretelgio Svia conungſ vaſ faþer aiſteinſ fretz fꜹþvr Halfdanar ens millda oc enſ matar illa foþor Goþroþar veiþiconungſ foþor halfdanar enſ ꜱvarta foþor Harallz enſ Harfagra eſ fyrſtr varþ þeꜱ kynſ einn conungr at ollom Norvegi Iɴ hoc codice contiɴeɴtur capitvla ⟨f⟩ʀa Iſlanz bygþ . i. fra laɴ⸌a⸍mſ moɴom ii. oc lagaſetning. fra alþingiſ ſetnıng iii. fra miꜱeriꜱ tali iiii. fra fiorþvngadeilld . v. fra Grenlaɴz bygþ . vi. fra þvi er Criſtni kom a Jſland vii. fra byſcopom vtlendom viii. fra Jſleifi byſcopi ix. fra Gizori byſcopi ⟨x.⟩

Incipit Libellus Jſlandorum ⟨J⟩ſland byɢþiſc fyrſt vr Norvegi a dogom Harallz enſ Harfagra Halfdanar ſonar enſ Svarta fyr þaɴ tiþ at ętlon oc tolo þeira Teitz foſtra mins þeꜱ maɴz er ec kunna spacaſtan ſonar Jſleifs byſcops . oc þorkelſ fꜹþor broþor mins Gelliſ ſonar er langt muɴþi fram oc þoriþar Snorra dottor Goþa eſ bęþi vaſ marg ſpoc oc olivgfroþ eſ Jvar ʀagnarſ ſonr Loþbrokar let drepa eadmund eɴ Helga Engla conung En þat vaſ dccc. lxx. epter burþ Criſtz at þvi eſ ritiþ eſ i ſogo hanz Jngolfur het maþur Noreɴ eſ ſaɴliga er ſagt at føre fyrſt þaþan til Jſlandz þa eſ Haralldur eɴ Harfagri var xvı vetra gamall en i aɴat ſiɴ fm vetrom ſiþarr. Haɴ bygþi suþr i ʀajkiar vic . þar er Jngolfſ hofþi kallaþr. fyr ꜹſtan Minþacſ ꜽri ſem hann kom fyrſt a land. en þar ingolfs fell fyr veſtan Olfoſſ  eſ hann lagþi ſina eigo a siþan. I þaɴ tiþ vaſ Jſland viþi vaxit a miþli fiallz oc fioro. Þa voro her meɴ Criſtner þeir er Norþmeɴ kalla papa. En þeir foro ſiþan a brꜹt af þvi at þeir villdo eigi veſa her viþ Heiþna meɴ. oc leto epter bøcr irſ⟨c⟩ar oc biollor oc bagla af þvi matti ſcilia at þeir voro meɴ Jrſcer En þa varþ fǫr manna mikil mioc vt hingat yr Norvege Til þeꜱ vɴz conungreɴ Haralldr baɴaþi af þvi at honom þotti Landauþɴ nema. þa ſęttuſc þeir a þat at hverr maþr ſcylldi giallda conungi v. avra ſa er eigi vęri fra þvi ſciliþr. oc þaþan føri hingat. En ſva er sagt at Haralldr vęri Lxx vetra conungr oc yrþi atrøþr. þꜹ hafa vpphǫf veriþ at gialldi þvi eſ nu er kallat Laɴdaurar. en þar gallzk ſtuɴdom meira en stuɴdom miɴa. vnz Olafr eɴ Digri gorþi ſcyrt at hverr maþr ſcylldi giallda conungi halfa mork ſa er føri a miþli Norvegſ oc Jſlaɴz . nema conor, eþa þeir meɴ eſ hann nęmi frä Sva ſagþi þorkell oſſ Gelliſ ſonr

⟨H⟩rollaugr ſonr ʀꜹgvallz iarls aMøri bygþi auſtr a Siþv . þaþan ero Siþv meɴ komner. Ketilbiorɴ Ketilſ ſonr maþr Norøɴ bygþi ſuþur at Moſfelli eno ǫfra . þaþan ero moſfillingar comner. Ǫþr dotter Ketils flatnefs Herſis Norønſ bygþi veſtr i Bręiþa firþi. þaþan ero Bręiþfirþingar co⟨m⟩ner. Helgi enn magri Norøɴ ſonr Eyvindar ꜹſtmaɴz byɢþi norþr i Eyiafirþi þaþan ero Eyfirþingar comner. En þa eſ Jſland vaſ viþa byɢt orþit. þa hafþi maþr ꜹſtrøɴ fyrſt Log vt hingat yr Norvegi ſa er Vlfliotr het. Sva sagdi Teitur oſſ. oc voro þa Vlfliötz Log kolloþ Haɴ var faþer Guɴars er Diuffdæler ero comner frä i eyiafirþi; En þav voro fleſt ſett at þvi ſem þa voro Golaþingſ Log eþa rǫþ þorleifs ens Spaca Horþa caraſonar voro til hvar viþ ſcylldi auca eþa af nema, eþa aɴaɴ veg setia Vlfliotr var ꜹſtr i Löni En ſva er sagt at Grimr Geitſcor vęri foſtbroþer haɴſ sa er kaɴaþi Jſland alt at raþi haɴſ aþr alþingi vęri att. en honom fecc hverr maþr pening til a landi her. en hann gaf fe þat siþan til Hofa

⟨A⟩lþingi vaſ sett at räþi Vlfliötz oc allra Laɴzmaɴa þar er nu eſ. En aþr vas þing a Kialarneſi þat eſ þorſteiɴ Ingolfſſonr Lan⟨d⟩näma mannz faþer þorkels mana Logſogo manns hafþi þar oc hofþingiar þeir eſ at þvi hvrfv En maþr hafþi ſecr orþit of þręls morþ eþa leyſingſ sa er land atti i Blaſcogom hann es nefndr þorer Croppinſkeggi En dottor ſonr hans eſ callaþr þorvalldr Croppinſkeggi . sa eſ for siþan i Auſtfiorþo oc breɴdi þar iɴi Guɴar broþor ſinn. Sva sagþi Hallur Orækia ſonr En sa het Kolur eſ myrdr vaſ. Viþ hann eſ keɴd gea ſv eſ þar eſ kolloþ siþan Cols gea ſem hręen fuɴduſc. Land þat varþ ⟨ſıþan⟩ allzheriar fe. En þat logþo Laɴdz meɴ til alþingisnꜽzlo. Af þvi eſ þar Almeɴing at viþa til alþingis i scogom. oc a hęiþom hagi til Hroſſa hafnar. þat sagþi Vlfheþiɴ oſſ. Sva hava oc spacer meɴ ſagt. at a Lx vetra yrþi Jſland albygt ſva at eigi vęri meiʀ siþan: Þvi nęr tok Hramɴ Logſogo Hængs ſonr Laɴama manſz, nęſtr Vlflioti oc hafꝺi xx. sumor Hann var yr ʀangarhverfi þat var Lx. vetrum epter drap eadmundar conungſ . vetri eþa tveim aþr Haralldr en Harfagri yrþi dꜹþr at tolo spacra maɴa. Þorareɴ ʀagabroþer ſonr Ǫleifs Hialta toc Logſogo nęſtr Hramni oc hafþi onnor xx. haɴ vaſ borgfirþer

⟨T⟩hat vaſ oc þa eſ ener Spocoſto meɴ a laɴdi her hofþo taliþ itveim miſſerom fioradaga eɴſ fiorþa huɴdraþſ. þat verþa vicur ii. eɴſ ſetta tegar en monoþr xii. þritøgnattar oc dagar iiii umbfram þa mercþo þeir at solargangi at sumar et munaþi aptr til varſ enſ en þat cuɴne engi ſegia þeim at degi einom vaſ fleira en heilom vicom gegɴdi i tveim miſſerom oc þat olli Enn maþr het þorſteiɴ Surtr haɴ vaſ Breiþfirþſcr sonur Hallstęins þorolpſſonar morſtrarſceggia Landnama maɴs; oc Oſcar þorsteins dottor enſ rauþa Hann drꜽmþi þat at hann hygþiſc veſa at Logbergi þa es var fiolment oc vaca enn hann hugþi alla menn aþra ſofa en siþan hvgþiſc hann sofna, en hann hugþi þa alla ⟨menn⟩ aþra vacna þaɴ draum reþ Øſyfr Helgaſonr moþor faþer Gellis þorkels ſonar ſva at aller menn myɴdi þegn varþ⟨a⟩ meþann hann męllti at Logbergi en siþan eſ hann þagnaþi at þa myndi aller þat röma es hann hefþi męllt Enn þeir voro baþer Spaker menn mioc. Enn ſiþan eſ meɴ qvomo til þingſ þa leitaþi hann þeꜱ räþs at Logbergi at et ſiaunda hvert sumar scylldi auka vicu. oc freiſta hve þa hlyddi. En ſva sem Oſyfur reþ draumenn þa vǫcnoþo aller meɴ viþ þat vel. oc vas þa þat þegar i Log leidt at raþi þorkels mana oc annar⟨r⟩a spacra manna. at retto tali i hverio are v. dagar eɴſ fiorþa hunþraþs ef eigi eſ Hlaup är enn þa einom fleira enn at ǫro tali verþa IIII. En þa eſ ꜽcſc at ǫro tali et ſiaunda hvert at vico en øngo at hinu þa verþa vij ǫr ſaman iamɴ Long at hvorotveggia. En ef hlaupǫr verþa II a miþli þeira eſ ꜹka ſcal þa þarf ꜹca et setta

⟨Þ⟩inga dęilld mikil varþ ä miþli þeira Þorþar Gellis sonar Olęifs feilaɴſ yrbręiþafirþi . oc Odz þeꜱ er kallaþur var Tungu Oddr . haɴ var Borgfirþſcr. þorvalldr sonur hans vas at breɴo Þorkels bluɴketils ſonar meþ Hæſna þori i Ǫrɴolfsdali: en þorþr Geller varþ hofþingi at soceɴe. af þvi at Herstęinn Þorkelſſonr Bluɴ ketilſſonar atti Þorvnni syſtor dottor hans. Hon vas Helgo dotter oc Guɴarſſ syster jofriþar es þorstęinn atti Egilsſonr Enn þeir voro sotter a þingi þvi es var i Borgarfirþi i þeim staþ es siþan es kallat Þingnes. Þat voro þa Log at Vigſacar scylldi sækia a þvi þingi eſ nęſt vaſ vett va⟨n⟩gi. En þeir borþoſc þar oc matti þingiþ eigi heyiaſc at Logum þar fell þorolfur refur broþer Ǫlfs i Dolom yr liþi þorþar Gellis . En siþan foro sacarnar til alþingis. oc borþuſc þeir þar þa eɴ. þa fellu meɴ yr Liþi Oddz . enda varþ secr haɴ Hæſna þorir oc drepiɴ siþann. oc fleiri þeir ⟨es⟩ at breɴvɴi vǫro. Þa talþi þorþr Geller tǫlo vmb. at Logbergi Hve illa moɴom gegndi at fara i ocuɴ þing at ſækia of vıg eþa harma sina. oc talþi hvat honom varþ fyrir aþr hann mętti þvi mali til laga coma. oc qvad ymiſſa vandręþi møndo verþa ef eigi reþiſc bætur ä. Þa vas landino ſcipt i fiorþunga sva at iii. vrþu þing i hveriom fiorþungi. oc scylldu þingunautar ęiga hvar ſac ſocner saman. Nema i Norþlendinga fiorþungi voro iiii. af þvi at þeir vrþu eigi a aɴat satter. þeir er fyr norþan voro Eyiafiorþ villdu eigi þangat sækia þingiþ oc eigi i Scagafiorþ þeir es þar voro fyr vestan. en þo scylldi iǫfn domnefna oc Logretto scipon yr þeira fiorþungi ſem or einom hveriom oþrom. Enn siþan voro sett fiorþungarþing. Sva sagþi oſſ Vlfheþin Guɴars ſonr Logſogomaþr. þorkell mane þorſteinſſonr jngolfs ſonar toc Logſogo epter þorarinn ʀaga broþor . oc hafdi xv. sumor þa hafþi þorgeir at Lioſavatɴi þorkelſſon⟨r⟩ xvij sumor

⟨L⟩and þat eſ kallat eſ Grænland faɴzc oc bygþiſc af Iſlande . Eirikr eɴ ʀauþi het maþr Breiþfirdſcr es for vt heþan þängat. oc nam þar land er ſiþan es kallaþur Eiriks fiórþur. Haɴ gaf nafn landino oc kallaþi Grænland . oc qvaþ meɴ þat myndv fyſa þangat farar at landiþ ætti nafn gott. þeir fundo þar maɴaviſter bęþi auſtr oc veſtr a Landi. oc kęiplabrot oc steinſmiþi þat eſ af þvi ma ſcilia at þar hafþi þeſſconar þiöþ fariþ eſ Vinland hefer bygt oc Grænleɴdingar calla Screlinga En þat vas es hann toc byɢva landiþ xiiii vetrom eþa xv fyrr en Criſtni qvæmi her a Jſland at þvi er sa talþi fyrer þorkeli Gelliſſyni a Grænlandi er sialfur fylgþi Eirike enom ʀauþa vt

⟨O⟩lafur rex Tryɢvaſonr Olafs ſonar Harallz ſonar eɴſ Harfagra com Criſtni i Noreg , oc a Jſland hann sendi hingat til laɴz prest þann er het Þangbrandur oc her kendi monnom Cristni oc ſkirþi þa alla es viþ Tru toco. En Hallur a Siþu þorsteins ſonr let ſciraſc ſnimhendis. oc Hiallti Sceggiasonur yr þiorsardali. oc Gizor eɴ Hviti Teitzſon⟨r⟩ Ketilbiarnarſonar fra moſfelli . oc marger hofþingiar aþrer. Enn þeir voro þo flęiri es i gegn męlto oc neitto. Enn þa er hann hafþi her veriþ einn vetr eþa ii. þa for hann a braut. oc hafdi vegit her ii. menn eþa iii. þa er hann hofþo nidt En hann ſagþi conunginom Olafi eſ hann com auſtr allt þat es her hafþi yfir hann gingiþ. oc let orvęɴt at her muɴdi Criſtni en tacaſc. En hann varþ viþ þat reiþr mioc oc ętlaþi at lata męiþa eþa drepa oſſa laɴda fyrer þa eſ þar voro auſtr. En þat sumar et sama qvomo vtan heþan þeir Gizor oc Hiallti oc þogo þa vɴdan viþ conungenn oc heto honom vmbſyſlo ſiɴi til a nyia lęic at her yrþi enn viþ Criſtniɴi tekit. oc leto ser eigi annars von en þar mundi hlyþa En et nęſta ſumar epter foro þeir auſtan oc prestur sa es þormoþr het. oc qvomo þa i Veſtmaɴa eyiar eſ .x. vicur voro af sumri oc hafþi allt fariſc vel at. Sva qvad Teitur þat ſegia es sialfur var þar. þa vas þat męlt et nęſta sumar aþr i Logom at meɴ scylldi sva coma til alþingis es x. vikur vęri af sumri. en þangat til qvomo viku fyrr Enn þeir foro þegar inn til meginnlaɴz oc siþan til alþingis. oc goto at Hiallta at hann vas epter i Laugardali meþ xii. maɴ af þvi at hann hafdi aþr secur orþit fiorbꜹgſ maþr et nęſta sumar a alþingi of goþgo. Enn þat vaſ til þeꜱ haft at hann qvad at Logbergi qviþling þenna

1
1Vil ec eigi goþ gøyia
2graj þykir mer fraja

Enn þeir Gizor foro vnz þeir qvomo i ſtaþ þann ihia Olfoſs vatni es kallaþr es Vellankatla. oc gøorþo orþ þaþan til þings at a mot þeim scylldi coma aller fulltings meɴ þeira af þvi at þeir hofþo spurt at andſcotar þeirra villdi veria þeim vigi þingvęllenn. En fyrr en þeir føri þaþann þa kom þar riþandi Hiallti oc þeir er epter voro meþ honom. En siþan riþv þeir a þingit. oc qvomu aþur a mot þeim frændur þeira oc viner sem þeir hofþo ęſt. En ener heiþnu meɴ Hvrfu ſamann meþ alvępni oc hafþi ſva nęr at þeir myndi beriaſt at ⟨eigi⟩ of ſa a miþli En annaɴ dag epter geingu þeir Gizor oc Hiallti til Logbergs, oc bǫro þar upp erindi sin. Enn ſva er sagt at þat bęri fra Hve vel þeir męltu. En þat gørþiſc af þvi at þar nefnþi annar maþr at oþrom vatta. oc sogþvsk hvarer yr Logom viþ aþra ener Crıſtnu meɴ oc ener Heiþno. oc gingo siþan frä Logbergi þa bodo ener Criſtno meɴ Hall a Siþo at hann ſcylldi log þeira vpp ſegia þav eſ Criſtnenne scyllde fylgia Enn hann leyſtiſc þvi vndan viþ þa at hann Caypti at þorgeiri Logſogo maɴi at hann scylldi vpp ſegia. en hann vas enn þa heiþinn. En siþan es meɴ qvomo i bvþer þa lagþiſc hann niþur þorgeiʀ . oc bręiddi felld sinn a sic oc hvilþi þann dag allann oc nottena epter oc qvad ecke orþ. En of morgoneng epter settiſc hann vpp. oc gørþi orþ at meɴ scylldi ganga til Logbergis. Enn þa hof hann tolo sina vpp eſ meɴ qvomo þar oc sagþi at honom þotti þa comit hag maɴa i onytt efni ef meɴ scylldi eigi hafa aller Log ęin a landi her. oc talþi fyrer moɴom a marga vega at þat scylldi eigi läta verþa oc ſagþi at þat muɴdi at þvi oſætti verþa eſ viſavon vas at þęr barſmiþer gørþiſc a miþli manna es landeþ eyddiſcaf Haɴ sagþi fra þvi at conungar yr Norvegi oc yr Danmorco hofþo haft ofriþ oc oʀostor a miþli sin langa tiþ til þeꜱ vnz laɴz meɴ gørþo friþ a miþli þeira þott þeir villdi eigi Enn þat räþ gørþiſc sva at af stundu senduſc þęir gerſemar a miþli. enda hellt friþr sa meþann þeir lifþv En nv þykker mer þat räþ qvaþ hann at ver latem oc eigi þa raþa. er meſt vilia i gegɴ gaɴgaſc oc miþlom sva ml a miþli þeira at hverertvegio havi nacqvat sins mäls oc hovom aller ein Log oc ęin⟨n⟩ siþ. þat mon verþa satt eſ ver ſlitom i sundr Logen. at ver monom ſlita oc friþeɴ. En hann lauc sva mali sino at hvarer tveggio jotto þvi at aller scylldi ein Log hava þav sem hann reþi vpp at seigia. þa vas þat męllt i logom at aller meɴ scylldi Criſtner veſa oc scirɴ taca þeir er aþur voro oſcirþer a landi her En of barna vtburþ scylldo standa en forno log oc ov Hroſſakiotzät. Scylldo meɴ blota a lavn ef villdo. en varþa fįorbaugs *garþ ef vottom of qvæmi viþ Enn siþar fom vetrom var sv heiþni af numen ſem onnor. Þeɴa atburþ ſagþi Teitur oſſ at þui er Criſtni com a jſland . En Olavur Tryɢva ſon⟨r⟩ fell et sama svmar at sogo Sęmundar preſtz . þa barþiſc hann viþ Svein Harallz ſon Dana conung . oc Olav en SønſcaEiricſ ſon at Vpſolum Svia conungs oc Eiric eſ ſiþann vas iarl at Norvegi Hǫconarſon Þat vas cxxx. vetrum epter dräp eadmundar . enn M. epter burþ Criſtz at alþyþo tali

⟨T⟩heꜱi ero novɴ byſcopa þeira es veriþ hafa a Jſlandi utlender at sogo Teitz . friþrecur com i heiþni her. en þeꜱer voro siþann. Biarnharþur en böcvïſi v. ǫr Colr fǫ ǫr. Hroþolvr xix ǫr. Jꜹhan eɴ irſki fǫ or. Biarnharþur xix. or. Heinrecur ii. or. Enn qvomo her aþrer v. þeir ed byſcopar qvoduſc veſa. Ornolfur oc Goþiſcolcr . oc iii. Ermſkir Petrus oc abraham oc Stephanus . Grimur at moſfelli Svertings ſonr toc Lꜹgsogo epter þorgeir . oc hafþi ii. sumor. en þa fecc hann lov til þeꜱ at Scapti þoroddz ſonr hefþi syſtor son hanz af þvi at hann vaſ Häſmęltur sialfur. Scapti hafþi Logſogo xxvii. svmor . Hann setti fimtar doms Log. oc þat at engi vegandi scylldi lyſa vig a hendr oþrom maɴi en ſer. En aþr voro her slic log of þat sem i Norvegi a hanz dogom vrþo marger hofþingiar oc ʀikis meɴ seker eþa Landflotta. of vig eþa barſmiþer af rikis sǫcom hanz oc landſtiorn. En hann andadiſc a eno sama are oc Olavur en Digre fell. Haʀallz ſonr Goþroþar ſonar Biarnar ſonar Harallz ſonar ens Harfagra . xxx vetrum siþar en Olavr felli Tryɢvaſonr þa toc Steiɴ þorgeſter ſonr Logſogo oc hafþi iii. svmor. þa hafþi þorkell Tiorva ſonr xx. sumor. þa hafþi Geller Bolvercſ ſonr ix. sumor.

Jſleifur Gizorar ſonr ens Hvïta vas vigþur til byſcops a dogom Harallz Norvegs conungs Sigurþar ſonar Halfdanar ſonar Sigurþar ſonar Hriſa Harallz ſonar ens Harfagra Enn es þat ſo hofþingiar oc goþer meɴ at jſleifur vas myklo nytri en aþrir keɴimeɴ þeir es a þvisa laɴdi nęþi þa selldo honom marger sono sïna til læringar oc leto vigia til presta. þeir vrþu siþan vigþer ii. til byſcopa. Collur er var j vic austr. oc joan at Holom . Jſleifur attı iii. sono. þeir vrþv aller hofþingiar nyter. Gizor byſcop oc Teitur preſtr faþer Halls oc þorvall*dr . Teit fæddi Hallur i Haukadali . sa maþr es þat vas almęlt at milldaſtr vęri oc agęſtr at goþo a landi her olęrþra maɴa. Ec kom oc til Hallꜱ vii. vetra gamall vetri epter þat es Geller þorkels ſonr foþor faþer minn oc foſtri andaþisc. oc vaſc þar xiiii vetur. Guɴar en Spaci hafþi tekit Logſogo þa es Geller let af. oc hafþi iii svmor. Þa hafþi Colbeiɴ floſaſonr vi. þat sumar er hann toc Logsogo fell Haralldur rex a Englandi . þa hafþi Geller i aɴat sinn iii sum*ur. þa hafþi Guɴar i aɴat sinn i sumar. þa hafþi Sighvatur Surts ſonr Syſtor son*r Colbeins viij. a þeim dogom com Sęmundur Sigfuſ ſonr suɴann af fraclandi hingat til landz oc let siþann vigiaſc til preſtz Jſleifur vas vigþur til byſcops þa es hann vas fimtøgur. þa vas Leo septimus pave. En hann vas en nęſta vetur j Norvegi oc for siþann vt hingat En hann andaþiſc i Scalahollti þa es hann hafþi allz verit byſcop iiii. vetur oc xx Sva sagþi Teitur oſſ. þat var a Drottins dęgi vi nottom epter Hatiþ þeira Petars oc Pǫls Lxxx vetra epter Olavs fall Tryɢvaſonar . þar vas ec þa meþ Teiti foſtra minom xii vetra gamall. En Hallur sagþi oſſ ſva. eſ bęþi vas minnigr oc olyginn oc mundi sialfur þat es hann var ſcirþur at þangbranþur ſcirþi hann þrevetrann en þat vas vetri fyr, en Cristni vęri her i log tekinn. en hann gørþi bv þritogur oc bio Lxiiii. vetur i Haukadali . oc hafþi xciiii vetur þa eſ hann andaþiſc. en þat vas of Hotiþ martens byſcops a enom x vetri epter andlat ⟨Jſleıfs⟩ byſcops

⟨G⟩izor byſcop sonur Jſleifs vas vigþr til byſcops at bæn laɴz maɴa a dogom Olavs conungs Harallz ſonar ii. vetrom epter þat es jſleifur andaþiſc. þann vas hann annan her a landi en annan a Gautlandi . En þa vas namɴ haɴſ rętt at hann het Giſroþur . sva sagþi hann oſſ. Marcus Sceɢia ſonr hafþi Logſogo nęſtr Sighvati oc toc þat sumar es Gizor byſcop hafþi einn vetur veriþ her a landi. en for meþ iiii. sumor oc xx. at haɴſ sogo er ſcrifoþ ęvi allra Logsogo manna a boc þeꜱi þeira es voro fyrer vart minni. enn honom sagþi þorarinn broþer haɴſ oc Sceggi faþer þeira oc fleiri spaker meɴ til þeira ęvi es fyrer haɴſ minni voro. at þvi eſ. Biarni eɴ Spaki hafþi sagt. foþor faþer þeira es mundi þoraren Logſogo maɴ oc vi aþra siþann. Gizor byſcop vas aſtſęlli af ollom Laɴz moɴom en hver maþr aɴara. þeira es ver vit*im her a landi hafa veriþ . af aſtſęlþ haɴſ oc af tolom þeira Sęmundar meþ vmbraþi marcuꜱ Logſogo maɴz vas þat i Log leidt at aller meɴ tolþo oc virþo alt fe sitt oc soro at rett virdt vęri hvart sem vas i Lonþom eþa i lauſa aurum oc gørþo tiuɴd af siþann. Þat ero míclar iartecner hvat hlyþner laɴzmeɴ voro þeim maɴi es hann com þvi framm at fe allt vas virdt meþ Svarþogom þat es a Jſlande vas oc landet sialft, oc Tiunder av grvar, oc Log a logþ at sua scal veſa meþan Jſland es byɢt Gizor byſcop let oc Log leggia a þat at stoll byſcops þeſs es a Jſlandi vęri scylldi i Scalahollti veſa en aþur vas hvergi. oc lagþi hann þar til stolſins Scalaholltz land oc margra cynia auþæfe ǫnnor, bęþi i londom oc i lauſom aurom. Enn þa es honom þotti sa staþur hava vel at ꜹþævom þroazk, þa gaf hann meir enn fiorþung byſcopsdoms sins til þeꜱ at helldr vęri .ii. byſcops stolar a landi her enn einn sva sem norþleɴdingar ęſtu hann til. Enn hann hafþi aþr latet telia buendur a landi her. Oc voro þa i auſtfirþingafiorþungi vii. hundroþ heil. En i ʀangęinga fiorþungi x. en i Bręiþ⟨firþ⟩inga fiorþungi .ix. en i ayfirþingafiorþungi .xii. en otalþer voro þeir eſ eigi tto þingfarar caupi at gegna ov allt jſand . ⟨V⟩lvheþiɴ Guɴarſſonr ens spaca toc Logsogo epter Marcus . oc hafþi ix sumor. þa hafþi Bergþorr Hrafɴſſonr vi. En þa hafþi Goþmundr þorgeirſſonr xii sumor. Et fyrsta sumar es Bergþor ſagþi log vpp vas nymęli þat gortt, at Log r scylldi scriva a böc at Havliþa moſſ ſonar of vetreɴ epter at sogo oc vmbraþi þeira Bergþors oc aɴara spacra maɴa, þeira er til þeꜱ voro tecner. Scylldu þeir gørua nymęli þꜹ ǫll i ʟogom er þeim Litiſc þau betri en en forno Log. Scylldi þau segia vpp et nęſta sumar epter i Logretto oc þau oll hallda es enn meire hlutur maɴa męlti þa eigi gegɴ. En þat varþ at framfara. at þa vaſ scrivaþur Vigſloþi, oc margt aɴat i Logom. oc sagt vpp i Logretto av kennimoɴom of sumar et epter. en þat licaþi ollom vel. oc męllti þvi mangi i gegɴ. þat vas oc et fyrsta sumar es Bergþor sagþi Log vpp, þa vas Gizor byſcop Oþingførr af sott, þa sendi hann Orþ til alþingis vinom sinom oc hofþingiom at biþia scylldi þorlac ʀunolfſſon þorleikſſonar broþor Halls i Haukadali at hann scylldi lata vigiasc til byſcops. En þat gerþo aller sva sem orþ haɴſ qvomo til. oc fecſc þat af þvi at Gizor hafþi sialvr fyrr mioc beþit. oc for hann vtan þat sumar. en kom vt et nęſta epter oc vas þa vigþur til byſcops. Gizor vas vigþur til byſcops þa es hann var fertogur. þa vas Gregorius Septimus pape. en siþaɴ vas hann en nęſta vetr i Danmorco , oc kom ov sumariþ epter hingat til laɴz En þa es haɴ hafþi veriþ xxiiii vetur byscop sua ſem faþer haɴſ. þa vas Joan Ǫgmundarſonr vigþur til byscops fyrstr til stöls at Hölom . þa vas hann vetri miþur en halffertogur. En xii vetrom siþar þa eſ Gizor hafþi alls veriþ byscop xxxvi. vetur. þa vas þorlacur vigþur til byscops. hann let Gizor vigia til stöls i Scalahollti at ser Livanda. þa vas þorlacur ii. vetrom meir en xxx. En Gizor byscop andaþiſc xxx. nottom siþar i Scala hollti a enom þridia deigi i vicu Kalendarum Junij. A þui äre eno sama obijt Paſchalis ſecundus pape fyʀ en Gizor byſcop . oc Baldvine jorſalaconungr oc arnaldus patriarcha i Hierusalem . oc Philippus Svia conungr . En siþar et sama sumar Alexius Grikkia conungr . þa hafþi hann xxxviii vetur setiþ at stoli i miclagarþi . En ii. vetrom siþar varþ alldamöt. þa hofþo þeir eyſteiɴ oc Sigurþur veriþ xvii. vetur conungar i Norvegi epter magnus foþor siɴ Olafsſon Harallz ſonar þat vas cxx. vetrum epter fall Olafs Tryɢvaſonar enn ccL. epter dräp eadmundar engla conungſ . Enn dxvi vetrum epter andlat Gregorius pava þeꜱ es Cristni com a England at þui es taliþ es. En hann andaþisc a oþro äre conungdoms Foco kęiſara .dciiii. vetrom epter burþ Criſtz at almaɴa tali. þat verþur allt ſamaɴ mcxx. or Her lyxc sia boc

þetta es cyn byscopa Iſlendinga oc ættar tala. ⟨K⟩etilbiorn landnams maþr sa es bygþi suþur at moſfelli eno øvra vas faþer Teitz foþor Gizorar eɴſ Hvita foþor Jſleifs es fyrstur vas byſcop i Scalahollti foþor Gizorar byscops ⟨H⟩rollaugur Laɴdnams maþr sa es bygþi auſtr a Siþu a Breiþabolſtaþ vas faþer Ozorar foþor þordiſar moþor Halls a Siþo foþor Egils foþor þorgerþar moþor Joaɴſ es fyrſtur vas byſcop at Holom . Oþr laɴdnams cona es bygþi veſtr i Breiþafirþi i Hvammi vas möþer þorsteins eɴſ ʀauþa foþor Oleivs fęilans foþor þorþar Gelles foþor þorhilldar ʀiupu moþor þorþar Heſthofþa foþor Carlſevnes foþor Snorra foþor Hallf⟨r⟩iþar moþor þorlacs es nu es byſcop i Scalahollti nęſtr Gizori ⟨H⟩elgi eɴ magri Laɴdnama maþr sa es bygþi norþr i Eyiafirþi i Criſtneſi vas faþer Helgo moþor Einarſſ foþor Eyiolfs Valgerþar sonar foþor Goþmuɴdar foþor Eyiolvs foþor þorsteins foþor ketils es nu es byſcop at Holom nęſtur Joaɴi  þeꜱi ero nofn langfeþga yɴɢlinga oc breifirþinga i. ⟨Y⟩ngui Tyrkia conungr .ii. Niǫrþr Sviaconungr .iii. Frayr iiii Fiolner . sa er do at frid fröþa . v Svegþer . vi. Vanlandi . vii. Uiſbuʀ viii. Domaldr . ix. Domaʀ .x. Dyɢue .xi. Dagur .xii. alrecr .xiii. agne xiiii. Yngvi .xv. Joruɴdr . xvi aun en gamli xvii. Egill vendilcraca xviii. Ǫttar xix aþiſll at vppſolom xx. Eyſteinn xxi. Yngvaʀ xxii. brꜹt ǫnundur . xxiii Jngialldr en illraþi xxiiii. Olavur Tretelgia .xxv. Halfdan Hvitbeiɴ vpplendinga conungr xxvi. Goþroþr xxvii. Olafur .xxviii. Helgi xxix. Jngialldur dottor sonur Sigurþar ʀagnars ſonar Loþbröcar xxx. Oleivur eɴ Hviti xxxi. þorsteiɴ enn ʀauþi xxxii. Oleifur Feilan es fyrſtur bygþi þeira a Jslandi xxxiii. Þorþur Geller . xxxiiii Eyiolfur es skirþur vas i elli siɴi þa es Criſtni com a jſland xxxv. þorell xxxvi. Geller faþer þeira þorkelz foþor Braɴz oc þorgils foþor mïns, enn ec heiter are