vænto ser ænskis annars en liggia þar æftir þa qualduzt oll rað firir
konongenom Oc orvilnaðest hann þa næsta undan quamo Nu i þæim suttum
oc nauðum er hann var stadr þa heto þæir aller a almatkan guð Oc a hinn
hælga Olaf konong til miscunnar oc baðo þann hinn a giæta guðs við tru oc
með tarom væita ser fullting at sigra þa guðs anskota Heto hanum oc hinni
hælgu mæy mariu vars drotens moðor ef þau hylpi þæím At lata gera
þæim til lofs oc til dyrðar kirkiu i miklagarðe En æigi var minni liðs mun
en sex tigir varo um æinn Nu mego þer her goðer menn hæyra fagra
iartæígn Jam-skiot bar þann guðs dyrling i sion við þa miok marga
i liði kon-onggsens Gecc hann þegar fram firir þa kristnu menn með dyrlego mærki
oc bændi þæim allum at fylgia ser Siðan væitu þæir til ræðe hinum hæi-ðnu
hundum af miklu kappe er þæir sᴀ þann hælga konong i liði með ser oc fulltingi
Oc fell þar þa firir þæim faliðum flester aller þæir hæiðrnu menn En sumir
flyðu oc komozt undan með mikla nauð þui næst for konongr þaðan með sigri
aftr til mikla garðz Oc let gera kirkiuna sem hann hafðe hæítít EOc let
vigia hinni hælgu mariu Oc sva mikla fear luti lagðu væringiar til oc
aller liðs menn til þess hælga virkis at mikil offrænd oc sva aðrer gripir
gengo þa af er kirkian var full gorr Oc ínna prydd með allre þæiri dyrð oc
vegsæmd er þæirr matto guði væita Sva ero oc sændar iðu-lega margar
gersimar til þess hins hælga staðar er hann huilir at or mikla garðe til lofs
oc til dyrðar firir marga halæita miscunn er hann hævir væitt hvært sinni er þæir hava
a hann hæitit ser til biargaR Sa var græivi æinn i
danmarku illr maðr nokcor oc auund fullr ræddezk hvarke guð
ne menn Hann atte ambot æina þa er ættað var oc fœdd i þrœnda lagum Oc dyrkaðe
hon oc truði fastlega a hinn hælga Olaf konong En sa guðs ovinr er
aðan var getet tortrygði þat allt er hann hafðe hæyrt sact fra þæim halæita
guðs manne oc hans iartæignum kvað þat ækci vera nema quítt æinn oc pata Oc
gerðe ser at gabbe oc at gamne lof hans oc dyrð þat er lannz folk væitti þæím
hæilaga kononge Nu com at þæim dægi er sa milldr konongr let lif sitt a Oc aller
kristnir menn dyrka þa villdi sa hinn ovitri græivi þui siðr þa hælgi
hallda At hann bauð hælldr ambot sinni þæiri þrœnsko firir auundar
sakar er hann hafðe við þann hælga mann at hon skilldi baca oc ællda
omn til brauðz oc baca þegar a þæim dægi Vita þottezk hon œðe hans
oc oscap at hann mindi hænni sar-lega hæmna ef hon lete æigi at
þui sem hann bauð hænnni Oc giængr hon til nauðig oc bakar i omne nom