menota

Menota data services

Menu Search
35r DG 8 (DG8)  - 35v 36r 

On this page...

En sœkia æigi aller i æinn stað Oc lyða þar æinnar kono orðom þæir er
æigi villdu lyða Olave kononge er nu sannhæilagr orðenn Hævir við hann veret
gort mikit niðings værk Oc er þui illa ræfst oc markt hævilec ivir
folket gængit Siðan er þetta valld kom ivir oss late guð þetta sem skiæmst
vera firir þui at þat hævir nu veret œret langt Giængr nu æínar af
þinginu oc allr mugrenn Væliazt nu til eno bæztu menn oc fara or lande oc
austr i garða Oc biðia iarizlæif konong at hann fenge þæim Magnus son
hins hælga Olafs konongs Vilia nu menn bœta a sœne hans þat er þæir gerðo við
faður hans konongrenn svarar at hann ræðest at þæir sviki hann firir þui at ver hauum
æigi fyrr hæyrt þetta boð þæirra En þæir svaraðu at bæztir menn varo
i þessom raðom Æinar oc svæinn bryggiu fotr kalfr Arna sun En
þui næst kom hann i land a fiorom vætrum æftir fall faður sins kœmr
hann nu i land m miklum veg En Svæinn stock or Ræðr nu
Magnus æinn firir rikinu Nu æigu aller menn hengat i norðr lond mikla til sio
at vænta ser af guðs dyrlings Olafs konongs Man hann mikit traust væita
manum i sinni arnan við guð firir þui at þa er hann lifði her þessa hæíms
þa læiðrette hann margan þann er aðr var farenn þæimun mun man
hann nu framar at hann fær nu alla luti framar miklu gort en vart se vit til
En æftir fra fall Olafs konongs þa var licamr hans tækinn þegar oc fluttr til hus nokcors
oc þuogo hirðmenn hans sialfs allvanlega oc varðvæitu þa kom Aumingi æinn
sionlaus m allu oc fell þar a kne firir durunum Oc skræið þar at sem vatneno
var niðr slægit er sar hans oc licamr var þuæginn i Oc vættezc hond hans
i þui vatne þa er hann stoð upp þa ræið hann þui um augu ser En þegar iamskiot
leðe guð hanum lios þess ens fagra er hann hafðe længi þarnazt
Allundarlect þotte hanum sialuum oc sva margum aðrum þæim sem þar varo oc
dyrkaðu nu aller menn af þui hinn hælga Olaf konong Er þa miklu miscunn væittí
Oc heto siðan aller agiætlega a hann sem værðuct var Oc lovaðu guð oc hinn hælga
Olaf konong æinkanlega æ siðan Sa var hærtoge æinn a irlande er
Guðþormr het foríngi mikill frægr at ræysti sinni oc at hvatlæik
hann var norrœnn at allu kyni Oc systur sunr hins hælga Olafs kon-ongs Kærr
var hann oc virkr konongenom i dyflinne þæim er Mardagus het Oc var vingan þæira
æinkar goð Nu bar sva til æinu sinni at þæir hafðu unnít sigr mikinn
oc orgrynni fear fængit i hærforenne En um dag nokcon er þæir foro
hæímlæiðis þa skilldu þæir skipta feno þui mikla sin a meðal æftir iam naðe
Close

Log in

This service is only available to members of the relevant projects, and to purchasers of the skaldic volumes published by Brepols.
This service uses cookies. By logging in you agree to the use of cookies on your browser.

Close