skaldic

Skaldic Poetry of the Scandinavian Middle Ages

Menu Search

Málsháttakvæði — Anon MhkvIII

Anonymous Poems

Roberta Frank 2017, ‘(Introduction to) Anonymous, Málsháttakvæði’ in Kari Ellen Gade and Edith Marold (eds), Poetry from Treatises on Poetics. Skaldic Poetry of the Scandinavian Middle Ages 3. Turnhout: Brepols, p. 1213.

 

- - - - - - - - - - þegir;
dylja má þess, er einn hverr segir;
- - - - - - - - - - - -
- - - eitt bregzk hóti síðr;
fœra ætlum forn orð saman
(flestir henda at nøkkvi gaman,
gleði minnar veit geipun sjá),
griplur er sem hendi þá.
 
The new edition is unavailable.
This text is from an old edition
Ekki hefk með flimtun farit,
fullvel ættak til þess varit,
(yrkja kann ek vônu verr)
vita þykkisk þat maðrinn hverr;
stolit væri mér ekki ór ætt,
jafnan þótt ek kvæða slétt;
róa verðr fyrst til ens næsta ness,
nǫkkut ættak kyn til þess.
 
The new edition is unavailable.
This text is from an old edition
Þjóð spyrr alt þat's þrír menn vitu,
þeir hafa verr, er tryggðum slitu,
ekki er því til eins manns skotit,
ýmsir hafa þau dœmi hlotit;
hermðar orð munu hittask í,
heimult ák at glaupsa of því,
(nǫkkut varð hon sýsla of sik)
svinneyg drós hvé hon fór við mik.
 
The new edition is unavailable.
This text is from an old edition
Ró skyldu menn reiði gefa,
raunlítit kømsk opt á þrefa,
gagarr er skaptr, þvít geyja skal,
gera ætlak mér létt of tal;
verit hafði mér verra í hug,
var þat nær sem kveisu flug,
jafnan fagnar kvikr maðr kú,
kennir hins, at gleðjumk nú.
 
The new edition is unavailable.
This text is from an old edition
Alllítit er ungs manns gaman,
einum þykkir daufligt saman,
annars barn er sem úlf at frjá,
óðfúss myndi blindr at sjá;
dýrt láta menn dróttins orð,
drekarnir rísa opt á sporð,
ǫðlingr skyldi einkar rǫskr,
œpa kann í mœrum frǫskr.
 
The new edition is unavailable.
This text is from an old edition
Fylki skal til frægðar hafa,
fregna eigum langt til gafa,
oddar gerva jarli megin,
útsker verða af bôrum þvegin;
ýmsir bjóða ǫðrum fár,
(ormar skríða ór hamsi á vár)
vel hefr sás þat líða lætr,
langar eigu þeir bersi nætr.
 
The new edition is unavailable.
This text is from an old edition
Bjarki átti hugarkorn hart,
herlið feldi Stǫrkuðr mart,
(ekki var hann í hvílðum hœgr),
Hrómundr þótti garpr ok slœgr;
ókat þeim né einn á bug,
Eljárnir var trúr at hug,
fílinn gat hann í fylking sótt,
fullstrǫng hefr sú mannraun þótt.
 
The new edition is unavailable.
This text is from an old edition
Bana þóttusk þeir bíða vel,
Brandingi svaf loks í hel,
Mardallar var glysligr grátr,
gleðr sá mann er opt er kátr;
Ásmundr tamði Gnóð við gjálfr,
gulli mælti Þjazi sjálfr,
Niðjungr skóf af haugi horn;
hølzti eru nú minni forn.
 
The new edition is unavailable.
This text is from an old edition
Friggjar þótti svipr at syni,
sá var taldr ór miklu kyni,
Hermóðr vildi auka aldr,
Éljúðnir vann sólginn Baldr,
ǫll grétu þau eptir hann,
aukit var þeim hlátrar bann,
heyrinkunn er frá hônum saga,
hvat þarf ek of slíkt at jaga.
 
The new edition is unavailable.
This text is from an old edition
Sitt mein þykkir sárast hveim,
sáttargǫrð er ætluð tveim,
oddamaðr fæsk opt enn þriði,
jafntrúr skal sá hvárra liði;
engi of dœmir sjálfan sik
(slíkt ætlak nú henda mik),
ýta lið þótt alt fari byrst,
engi læzk því valda fyrst.
 
The new edition is unavailable.
This text is from an old edition
Stefjum verðr at stæla brag,
stuttligt hefk á kvæði lag,
ella mun þat þykkja þula,
þannig nær sem ek henda mula.
Ekki var þat forðum farald,
Finnan gat þó œrðan Harald,
hônum þótti sólbjǫrt sú,
slíks dœmi verðr mǫrgum nú.
 
The new edition is unavailable.
This text is from an old edition
Skips láta menn skammar rár,
skatna þykkir hugrinn grár,
tungan leikr við tanna sár,
trauðla er gengt á ís of vár;
mjǫk fár er sér œrinn einn,
eyvit týr, þótt skyndi seinn,
gǫfgask mætti af gengi hverr,
gǫrva þekkik sumt hvé ferr.
 
The new edition is unavailable.
This text is from an old edition
Afli of deilir sízt við sjô,
Sǫrli sprakk af gildri þrô,
stundum þýtr í logni lô,
litlu verr, at ráðak fô;
mǫrgum þykkir fullgott fé,
frænuskammr er enn deigi lé,
kvæðit skal með kynjum alt,
konungs morginn er langr ávalt.
 
The new edition is unavailable.
This text is from an old edition
Bráðsét láta bragnar opt,
bregðr at þeim, er heldr á lopt,
allmargr er til seinn at sefask,
svá kǫllum vér rôð sem gefask.
Ekki var þat forðum farald,
Finnan gat þó œrðan Harald,
hônum þótti sólbjǫrt sú,
slíks dœmi verðr mǫrgum nú.
 
The new edition is unavailable.
This text is from an old edition
Auðigr þykkir einn sér hvar,
annars rœðir margr of far,
ørgranns erum vér lengst á leit,
lundvær þykkir bezta sveit;
skammæ þykkja ófin ǫll,
ekki mart er verra en trǫll,
eigi spillir hyggins hjali,
hefkat ek spurt at bersa kali.
 
The new edition is unavailable.
This text is from an old edition
Engi þarf at hræðask hót,
heldr kømr opt við sáran fót,
- - - - - - - - - - - -
hlutgjarn ferr með annars sǫk;
nøkkvi ríkstr er heima hverr,
- - - - - - - - - - - -
øngu tala ek umb at síðr,
orðin fara þegar munninn líðr.
 
The new edition is unavailable.
This text is from an old edition
Varla sýnisk alt sem er
ýtum þeim, er bægir drer,
eigi at eins er í fǫgru fengr,
fundit mun þat er reynt er lengr.
Ekki var þat forðum farald,
Finnan gat þó œrðan Harald,
hônum þótti sólbjǫrt sú,
slíks dœmi verðr mǫrgum nú.
 
The new edition is unavailable.
This text is from an old edition
Efnum þykkir bezt at búa,
brǫgðótt reyndisk gemlu fúa,
margar kunni hon slœgðir sér,
svá nǫkkvi gafsk Rannveig mér;
illa hefr sás annan sýkr,
eigi veit áðr hefndum lýkr,
bráðfengr þykkir brullaups frami,
brigða lengi er hverr enn sami.
 
The new edition is unavailable.
This text is from an old edition
Lýtin þykkja skammæ skarar,
skrautligt kǫllum nafnit farar,
trautt kallak þann valda er varar,
verða menn þeir er uppi fjarar,
ógipt verðr í umbúð skjót,
élin þykkja mǫrgum ljót,
engi of sér við ǫllum rokum,
jafnan spyrja menn at lokum.
 
The new edition is unavailable.
This text is from an old edition
Ástblindir 'ro seggir svá
sumir, at þykkja mjǫk fás gá,
(þannig verðr of mansǫng mælt)
marga hefr þat hyggna tælt.
Ekki var þat forðum farald,
Finnan gat þó œrðan Harald,
hônum þótti sólbjǫrt sú,
slíks dœmi verðr mǫrgum nú.
 
The new edition is unavailable.
This text is from an old edition
Ynðit láta engir falt,
allopt verðr í hreggi svalt,
andaðs drúpa minjar mest,
magran skyldi kaupa hest;
œrit þykkir viðkvæm vô,
vinfengin eru misjǫfn þá,
fasthaldr varð á Fenri lagðr,
fíkjum var mér ramligr sagðr.
 
The new edition is unavailable.
This text is from an old edition
Grandvarr skyldi enn góði maðr,
Gizurr varð at rógi saðr,
etja vildi jǫfrum saman,
ekki er mér at stúru gaman;
kunna vildak sjá við snǫrum,
sjaldan hygg at gyggvi vǫrum,
vel hefr hinn, er sitr of sitt,
svartflekkótt er kvæði mitt.
 
The new edition is unavailable.
This text is from an old edition
Jafnan segir enn ríkri rôð,
rǫskvir menn gefa ǫrnum brôð,
upp at eins er ungum vegar,
engi maðr er roskinn þegar;
falls er vôn af fornu tré,
fleira þykkir gott en sé,
auðsénna er annars vamm,
engi kømsk of skapadœgr framm.
 
The new edition is unavailable.
This text is from an old edition
Engi knettr of annars mein,
(aldri lætk at munni sein)
heimi heyrik sagt at snúi,
sumir einir hygg at mér trúi;
erfitt verðr þeims illa kann,
engan þarf at hjúfra mann,
þannig hefr mér lagzk í lund,
langviðrum skal eyða grund.
 
The new edition is unavailable.
This text is from an old edition
Sjaldan hittisk feigs vǫk frørin,
fljóðin verða at ǫldrum kørin,
lengi hefr þat lýst fyr mér,
lítinn kost á margr und sér;
sagt er frá, hvé neflauss narir,
nú verðr sumt þats mangi varir,
(væri betr at þegðak þokks)
þat hefr hverr er verðr er loks.
 
The new edition is unavailable.
This text is from an old edition
Þrýtra þann er verr hefr valt,
verða kann á ýmsa halt,
misjafnir 'ro blinds manns bitar,
bǫlit kǫllum vér ilt til litar;
eik hefr þats af ǫðrum skefr,
ekki mart er slœgra en refr,
jafnan verðr at áflóð stakar,
auðfengnar 'ro gelti sakar.
 
The new edition is unavailable.
This text is from an old edition
Gullormr á sér brennheitt ból,
bjartast skínn í heiði sól,
undrum þykkir gagnsætt gler,
glymjandi fellr hrǫnn of sker;
allar girnask ár í sjá,
ekki er manni verra en þrá,
fýsa munk ens fyrra vara,
flestr mun sik til nǫkkurs spara.
 
The new edition is unavailable.
This text is from an old edition
Geta má þess er gengit hefr,
gerir sá betr er annan svefr,
veitkat víst hvat verða kann,
villa er dælst of heimskan mann,
flárôðum má trautt of trúa,
til sín skyldi enu betra snúa,
hugga skal þanns harm hefr beðit,
hølzti mjǫk er at flestu kveðit.
 
The new edition is unavailable.
This text is from an old edition
Orða er leitat mér í munn,
mælgin verðr oss heyrinkunn,
(Yggjar bjór hverr eiga myni
ósýnt þykkir lýða kyni);
eyvit mun sjá atfrétt stoða,
allmjǫk er mér lund til hroða,
þeygi var sjá aflausn ill,
eiga skal nú hverr er vill.
 
The new edition is unavailable.
This text is from an old edition
Stjórnlausu hefk slungit saman,
svá vildak [mér hitta gaman].
 
The new edition is unavailable.
This text is from an old edition
Close

Log in

This service is only available to members of the relevant projects, and to purchasers of the skaldic volumes published by Brepols.
This service uses cookies. By logging in you agree to the use of cookies on your browser.

Close

Information about a text: poem, sequence of stanzas, or prose work

This page is used for different resources. For groups of stanzas such as poems, you will see the verse text and, where published, the translation of each stanza. These are also links to information about the individual stanzas.

For prose works you will see a list of the stanzas and fragments in that prose work, where relevant, providing links to the individual stanzas.

Where you have access to introduction(s) to the poem or prose work in the database, these will appear in the ‘introduction’ section.

The final section, ‘sources’ is a list of the manuscripts that contain the prose work, as well as manuscripts and prose works linked to stanzas and sections of a text.