skaldic

Skaldic Poetry of the Scandinavian Middle Ages

Menu Search

Krákumál — Anon KrmVIII (Ragn)

Anonymous Poems

Rory McTurk 2017, ‘(Introduction to) Anonymous, Krákumál’ in Margaret Clunies Ross (ed.), Poetry in fornaldarsögur. Skaldic Poetry of the Scandinavian Middle Ages 8. Turnhout: Brepols, p. 706.

 

Hjoggum vér með hjǫrvi.
Hitt vas æ fyr lǫngu
es á Gautlandi gingum
at grafvitnis morði;
þá fingum vér Þóru,
þaðan hétu mik fyrðar,
es lyngǫlun lagðak,
Loðbrók at því vígi;
stakk á storðar lykkju
stáli bjartra mála.
 
The new edition is unavailable.
This text is from an old edition
Hjoggum vér með hjǫrvi.
Heldr vask ungr, es skífðum
austr í Eyrasundi
undarn frekum vargi,
ok fótgulum fogli
fingum vér, þars sungu
við háseymða hjalma
hǫrð jôrn, mikils verðar;
allr vas ægir sollinn,
óð hrafn í valblóði.
 
The new edition is unavailable.
This text is from an old edition
Hjoggum vér með hjǫrvi.
Hôtt bôrum þá geira,
es tvítøgir tǫlðumk,
ok tjǫr ruðum víða;
unnum átta jarla
austr fyr Dínu mynni;
gera fingum þá gnóga
gisting at því vígi;
sveiti fell í sollinn
sæ, týndi lið ævi.
 
The new edition is unavailable.
This text is from an old edition
Hjoggum vér með hjǫrvi.
Heðins kvánar varð auðit,
þás Helsingja heimtum
til heimsala Óðins;
lǫgðum upp í Ívu,
oddr náði þá bíta,
ǫll vas unda gjalfri
ô sú roðin heitu;
grenjaði brandr við brynjur,
bensíldr klufu skildi.
 
The new edition is unavailable.
This text is from an old edition
Hjoggum vér með hjǫrvi.
Hygg engan þá frýðu,
áðr á Hefils hestum
Herrøðr í styr felli;
klýfrat ægis ǫndrum
annarr jarl in frægri
lunda vǫll til lægis
á langskipum síðan;
sá bar siklingr víða
snart framm í styr hjarta.
 
The new edition is unavailable.
This text is from an old edition
Hjoggum vér með hjǫrvi.
Herr kastaði skjǫldum,
þás rægagarr rendi
ræstr at gumna brjóstum;
beit í Skarpa-skerjum
skœru-bíldr at hjaldri;
roðinn vas randar máni,
áðr Rafn konungr felli;
dreif ór hǫlða hausum
heitr á brynjur sveiti.
 
The new edition is unavailable.
This text is from an old edition
Hjoggum vér með hjǫrvi.
Hôtt grenjuðu rottar,
áðr á Ullarakri
Eysteinn konungr felli;
gingum golli fáðir
grundar vals af brǫndum
(rækyndill smó rauðar
rítr) at hjalma móti;
svíra virtr ór sôrum
sveif of hjarna kleifar.
 
The new edition is unavailable.
This text is from an old edition
Hjoggum vér með hjǫrvi.
Hafa gôtu þá rafnar
fyr Inndyris-eyju
œrna brôð at slíta;
fingum fôlu hestum
fullan verð at sinni
(ilt vas eins at gæta)
með uppruna sólar;
strenghǫmlur sák stíga,
stǫkk malmr á skǫr hjalmi.
 
The new edition is unavailable.
This text is from an old edition
Hjoggum vér með hjǫrvi.
Hôðum rendr í dreyra,
þás benstara bræddum
fyr Borgundarholmi;
hreggský slitusk hringa,
hratt almr af sér malmi;
Vǫlnir fell at vígi,
vasat einn konungr meiri;
val rak vítt of strandir,
vargr fagnaði tafni.
 
The new edition is unavailable.
This text is from an old edition
Hjoggum vér með hjǫrvi.
Hildr vas sýnt í vexti,
áðr Freyr konungr felli
í Flæmingja veldi;
náði blár at bíta
blóði smeltr í gyltan
Hǫgna kufl at hjaldri
harðr bengrefill forðum;
mær grét morginskæru
mǫrg, en tafn fekksk vǫrgum.
 
The new edition is unavailable.
This text is from an old edition
Hjoggum vér með hjǫrvi.
Hundruðum frák liggja
á Eynæfis ǫndrum,
þars Englanes heitir;
siglðum vér til snerru
sex dœgr, áðr lið felli;
ôttum odda messu
við uppruna sólar;
varð fyr vôrum sverðum
Valþjófr í styr hníga.
 
The new edition is unavailable.
This text is from an old edition
Hjoggum vér með hjǫrvi.
Hrunði -dǫgg af sverðum
brún í Barðafirði
bleika ná- fyr hauka;
umði almr, þars oddar,
allstrítt, bitu skyrtur
at slíðrloga sennu
Svǫlnis hamri þœfðar;
rendi orms til unda
eitrhvass drifinn sveita.
 
The new edition is unavailable.
This text is from an old edition
Hjoggum vér með hjǫrvi.
Heldum Lakkar tjǫldum
hôtt at hildar leiki
fyr Hjaðninga-vági;
sjá knôttu þá seggir,
es sundruðum skjǫldu
at hræsíldar hjaldri,
hjalm slitnaðan gotna;
vasat sem bjarta brúði
í bing hjá sér leggja.
 
The new edition is unavailable.
This text is from an old edition
Hjoggum vér með hjǫrvi.
Hǫrð kom ríð á skjǫldu,
nár fell niðr til jarðar
á Norðimbralandi;
vasat of eina óttu
ǫldum þǫrf at frýja
Hildar leiks, þars hvassir
hjalmstofn bitu skjómar;
vasat sem unga ekkju
í ǫndvegi kyssa.
 
The new edition is unavailable.
This text is from an old edition
Hjoggum vér með hjǫrvi.
Herþjófi varð auðit
í Suðreyjum sjǫlfum
sigrs á vôrum mǫnnum;
varð í randar regni
Rǫgnvaldr fyrir hníga,
sá kom hæstr of hǫlða
harmr at sverða gusti;
hvast kastaði hristir
hjalms strenglágar palmi.
 
The new edition is unavailable.
This text is from an old edition
Hjoggum vér með hjǫrvi.
Hverr lá þverr of annan;
glaðr varð geira hríðar
gaukr at sverða leiki;
léta ǫrn né ylgi,
sás Írlandi stýrði,
(mót varð malms ok rítar)
Marstan konungr fasta;
varð í Veðrarfirði
valtafn gefit hrafni.
 
The new edition is unavailable.
This text is from an old edition
Hjoggum vér með hjǫrvi.
Hundmargan sák falla
morginstund fyr mæki
mann í odda sennu;
syni mínum hneit snimma
slíðra þorn við hjarta;
Egill lét Agnar ræntan
óblauðan hal lífi;
glumði geirr við Hamðis
gránserk, bliku merki.
 
The new edition is unavailable.
This text is from an old edition
Hjoggum vér með hjǫrvi.
Haldorða sák brytja
ekki smátt fyr ulfa
Endils niðja brǫndum;
vasat á Víkaskeiði,
sem vín konur bæri;
hroðinn vas ægis asni
ófár í dyn geira;
skorin vas Skǫglar kápa
at skjǫldunga hjaldri.
 
The new edition is unavailable.
This text is from an old edition
Hjoggum vér með hjǫrvi.
Hôðum sverðs at morni
leik fyr Lindiseyri
við lofðunga þrenna;
fár átti því fagna
(fell margr í gin vargi,
haukr sleit hold með ulfi),
at heill þaðan kœmi;
Íra blóð í ægi
œrit fell of skœru.
 
The new edition is unavailable.
This text is from an old edition
Hjoggum vér með hjǫrvi.
Hárfagran sák røkkva
meyjar dreng of morgin
ok málvini ekkju;
vasat sem varmar laugar
vínkers Njǫrun bæri
oss í Álasundi,
áðr Ǫrn konungr felli;
bǫðmána sák bresta,
brá því fira lífi.
 
The new edition is unavailable.
This text is from an old edition
Hjoggum vér með hjǫrvi.
Hô sverð bitu skjǫldu,
þás gollhroðinn glumði
geirr við Hildar næfri;
sjá mun í Ǫnguls-eyju
of aldr mega síðan,
hversu at lǫgðis leiki
lofðungar framm gingu;
roðinn vas út fyr eyri
ár flugdreki sára.
 
The new edition is unavailable.
This text is from an old edition
Hjoggum vér með hjǫrvi.
Hví sé drengr at feigri,
at hann í odda éli
ǫndurðr látinn verði?;
opt sýtir sá ævi,
es aldrigi nistir
(ilt kveða argan eggja)
ǫrn at sverða leiki;
hugblauðum kømr hvergi
hjarta sitt at gagni.
 
The new edition is unavailable.
This text is from an old edition
Hjoggum vér með hjǫrvi.
Hitt telk jafnt, at gangi
at samtogi sverða
sveinn í móti einum;
hrøkkvit þegn fyr þegni,
þat vas drengs aðal lengi;
æ skal ástvinr meyja
einarðr í dyn sverða.
 
The new edition is unavailable.
This text is from an old edition
Hjoggum vér með hjǫrvi.
Hitt sýnisk mér raunar,
at forlǫgum fylgjum,
fár gengr of skǫp norna;
eigi hugðak Ellu
at aldrlagi mínu,
þás blóðvali bræddak
ok borð á lǫg keyrðak;
vítt fingum þá vargi
verð í Skotlands fjǫrðum.
 
The new edition is unavailable.
This text is from an old edition
Hjoggum vér með hjǫrvi.
Hitt lœgir mik, jafnan
at Baldrs fǫður bekki
búna veitk at sumblum;
drekkum bjór af bragði
ór bjúgviðum hausa;
sýtira drengr við dauða
dýrs at Fjǫlnis húsum;
eigi kømk með æðru
orð til Viðris hallar.
 
The new edition is unavailable.
This text is from an old edition
Hjoggum vér með hjǫrvi.
Hér vildi nú allir
burir Áslaugar brǫndum
bitrum hildi vekja,
ef vandliga vissi
of viðfarar ossar,
hvé ófáir ormar
eitrfullir mik slíta;
móðernis fekk mínum
mǫgum, svát hjǫrtu dugðu.
 
The new edition is unavailable.
This text is from an old edition
Hjoggum vér með hjǫrvi.
Harðla líðr at ævi,
grimt stendr grand af naðri,
góinn byggvir sal hjarta;
væntum hins, at Viðris
vǫndr í Ellu standi;
sonum mínum mun svella
sinn fǫður ráðinn verða;
munuat snarpir sveinar
sitt kyrt vesa láta.
 
The new edition is unavailable.
This text is from an old edition
Hjoggum vér með hjǫrvi.
Hefr fimm tøgum sinna
folkorrostur framðar
fleinþings boði ok eina;
minst hugða ek manna,
at mér vesa skyldi
(ungr namk odd at rjóða)
annarr konungr fremri;
oss munu æsir bjóða,
esat sýtandi dauði.
 
The new edition is unavailable.
This text is from an old edition
Fýsumk hins at hætta,
heim bjóða mér dísir,
þær's frá Herjans hǫllu
hefr Óðinn mér sendar;
glaðr skalk ǫl með ôsum
í ǫndvegi drekka;
lífs eru liðnar vánir,
læjandi skalk deyja.
 
The new edition is unavailable.
This text is from an old edition
Close

Log in

This service is only available to members of the relevant projects, and to purchasers of the skaldic volumes published by Brepols.
This service uses cookies. By logging in you agree to the use of cookies on your browser.

Close

Information about a text: poem, sequence of stanzas, or prose work

This page is used for different resources. For groups of stanzas such as poems, you will see the verse text and, where published, the translation of each stanza. These are also links to information about the individual stanzas.

For prose works you will see a list of the stanzas and fragments in that prose work, where relevant, providing links to the individual stanzas.

Where you have access to introduction(s) to the poem or prose work in the database, these will appear in the ‘introduction’ section.

The final section, ‘sources’ is a list of the manuscripts that contain the prose work, as well as manuscripts and prose works linked to stanzas and sections of a text.